ग्यासमा कमिसन बढाएसँगै उद्योगीको आन्दोलन फिर्ता

काठमाडौं, २१ फागुन । सरकार र आन्दोलनरत ग्यास उद्योगीबिच पाँचबुँदे सहमति भएको छ ।

सरकार र नेपाल एलपी ग्यास उद्योग संघबीच भएको वार्तामा प्रतिसिलिन्डर ग्यासमा १२ रुपैयाँ ७५ पैसा कमिसन बढाउनेसहित ५ बुँदे सहमति भएसँगै ग्यास उद्योगीहरूले आन्दोलन फिर्ता लिएका हुन् ।

ग्यास उद्योगको बाह्य ढुवानी, आन्तरिक ढुवानी भाडा, सञ्चालन तथा प्रशासनिक खर्च रकममा समायोजन गरी साबिकको खर्चमा प्रतिसिलिन्डर १२ रुपैयाँ ७५ पैसा वृद्धि गरिएको नेपाल आयल निगमले जनाएको छ ।

निगमका अनुसार प्रतिसिलिन्डर १२ रुपैयाँ ७५ पैसा कमिसन बढाउने सहमति भए पनि यसको मार भने उपभोक्तामा नपर्ने अर्थात प्रतिसिलिन्डर १९ सय १० रुपैयाँ नै पर्नेछ ।

पछिल्लो समय उद्योगीले घोषणा गरेको आन्दोलनका कारण उपभोक्ताले ग्यास पाउन लामो समय कुर्नु परेको थियो । ग्यास उद्योगीले लामो समयदेखि ग्यासमा कमिसन वृद्धि नहुँदा व्यवसाय सञ्चालन गर्न कठिन भएको भन्दै प्रतिसिलिन्डर ५० रुपियाँ बढाउन माग गर्दै आइरहेका थिए।