गणेश नेपाली मृत्यु घटनामा छानबिनका लागि ३ नगर प्रहरी नियन्त्रणमा
काठमाडौं, २६ असार । गणेश नेपाली मृत्यु प्रकरणमा अनुसन्धानका लागि ३ जना नगर प्रहरीलाई पक्राउ गरिएको छ ।
जिल्ला प्रहरी परिसर काठमाडौंका अनुसार दुई महिला र एक पुरुष गरी ३ जना नगर प्रहरीलाई सोधपुछका लागि नियन्त्रणमा लिइएको हो । उनीहरुलाई कालीमाटी वृत्तमा राखेर अनुसन्धान अगाडि बढाइएको प्रहरीले जनाएको छ।
बिहीबार दिउँसो काठमाडौंको त्रिपुरेश्वरस्थित राहदानी विभागअगाडि आफ्नै शरीरमा आगो लगाउँदा मुगुका गणेश नेपाली गम्भीर घाइते भएका थिए । उपचारका लागि वीर अस्पताल भर्ना गरिएका गणेशको उपचारको क्रममा आज निधन भएको हो ।
‘राइड सेयरिङ’ मार्फत जीविकोपार्जन गर्दै आएका गणेशका परिवार तथा आफन्तले नगर प्रहरीले मृतकको बाइकमा ‘ह्वील लक’ लगाइदिएका कारण आत्मदह प्रयास गरेको भन्ने आरोप छ।
What's Your Reaction?
