भेनेजुएलामा विनाशकारी भूकम्प : मृतक संख्या एक लाखसम्म पुग्न सक्ने चेतावनी
काराकास। दक्षिण अमेरिकी राष्ट्र भेनेजुएलामा बुधबार साँझ आएका दुई शक्तिशाली भूकम्पले ठूलो जनधनको क्षति पुर्याएको आशंका गरिएको छ। प्रारम्भिक विश्लेषणहरूका अनुसार मृतकको संख्या हजारौँ पुग्न सक्ने तथा सबैभन्दा खराब अवस्थामा एक लाख नाघ्न सक्ने जोखिम औंल्याइएको छ।
अमेरिकी भूगर्भ सर्वेक्षण (USGS) को ‘पेजर’ (PAGER) प्रणालीले सार्वजनिक गरेको मूल्याङ्कन अनुसार यस भूकम्पीय विपत्तिबाट १० हजारदेखि १ लाखसम्म मानिसको ज्यान जान सक्ने सम्भावना रहेको छ। उक्त प्रणालीले भूकम्पको तीव्रता, जनघनत्व र संरचनागत क्षतिको आधारमा सम्भावित मानवीय क्षतिको अनुमान गर्ने गर्दछ।
भूकम्प गएको दिन ‘काराबोबो युद्ध’ को स्मृतिमा राष्ट्रिय बिदा रहेकाले अधिकांश नागरिक घरमै रहेका थिए। त्यसै बेला धेरै भवन तथा आवासीय संरचनाहरू भत्किँदा मानवीय क्षति अत्यधिक भएको अनुमान गरिएको छ।
राजधानी काराकाससहित देशका प्रमुख शहरहरूमा दूरसञ्चार सेवा, मोबाइल नेटवर्क र विद्युत आपूर्ति अवरुद्ध भएको जनाइएको छ। सञ्चार प्रणाली नै प्रभावित भएकाले उद्धार तथा राहत कार्यमा कठिनाइ उत्पन्न भएको छ।
भेनेजुएला सरकारले हालसम्म मृतक तथा घाइतेहरूको आधिकारिक राष्ट्रिय तथ्यांक सार्वजनिक गर्न सकेको छैन। यद्यपि उद्धारकर्मीहरू प्रभावित क्षेत्रमा खोज तथा उद्धार कार्यमा निरन्तर खटिएका छन्।
यस प्राकृतिक विपत्तिको वास्तविक क्षति विवरण सञ्चार तथा यातायात सेवा क्रमशः सुचारु भएसँगै सार्वजनिक हुने अपेक्षा गरिएको छ।
What's Your Reaction?
