मेसी र सलाहको भिडन्तमा केन्द्रित अर्जेन्टिना–इजिप्ट प्रतिस्पर्धा

काठमाडौं । मर्सिडिज बेन्ज स्टेडियम, एटलान्टामा आज हुने अर्जेन्टिना र इजिप्टबीचको रोमाञ्चक प्रतिस्पर्धामा सबैको ध्यान दुई सुपरस्टार खेलाडीमा केन्द्रित हुनेछ। अर्जेन्टिनाका कप्तान लियोनल मेसी र इजिप्टका कप्तान मोहम्मद सलाह खेलका मुख्य आकर्षण रहनेछन्।

समूह चरणमा उत्कृष्ट प्रदर्शन गरेको अर्जेन्टिनाले अल्जेरिया, अस्ट्रिया र जोर्डनलाई पराजित गर्दै समूह विजेताको रूपमा नकआउट चरणमा प्रवेश गरेको थियो। विश्व वरीयताको दोस्रो स्थानमा रहेको अर्जेन्टिना उपाधिको प्रमुख दाबेदारका रूपमा हेरिएको छ।

यता, इंग्लिस प्रिमियर लिगमा अनुभव बटुलेका खेलाडीहरूको साथ रहेको इजिप्टले समूह ‘जी’ मा बेल्जियम र इरानसँग बराबरी खेलेको थियो भने अन्तिम खेलमा न्युजिल्यान्डलाई ३–१ ले हराउँदै राउन्ड अफ ३२ मा स्थान सुरक्षित गरेको थियो। नकआउट चरणको पहिलो खेलमा इजिप्टले अस्ट्रेलियालाई पेनाल्टी सुटआउटमा पराजित गर्दै अर्जेन्टिनासँगको भेट पक्का गरेको हो।

इजिप्टका अधिकांश डिफेन्स र मिडफिल्ड खेलाडीहरू साउदी प्रो–लिगमा आबद्ध छन्। एसियाली लिग भए पनि साउदी प्रो–लिगको प्रतिस्पर्धात्मक स्तर पछिल्ला वर्षहरूमा उल्लेखनीय रूपमा उकासिएको मानिन्छ।

इजिप्टका स्टार फरवार्ड मोहम्मद सलाह हालसम्म देशले उत्पादन गरेको उत्कृष्ट फुटबलरमध्ये एक मानिन्छन्। मांसपेशीको सामान्य चोटका कारण केही खेल गुमाएका सलाह अहिले पूर्ण रूपमा फिट रहेको र अर्जेन्टिनाविरुद्ध मैदान उत्रन तयार रहेको जनाइएको छ।

अर्जेन्टिनाको टोलीमा मेसीसँगै लौटारो मार्टिनेज, जुलियन अल्भारेज, रोड्रिगो डी पाउल, एलेक्सिस म्याक एलिस्टर, एन्जो फर्नान्डेज र थिएगो अल्माडा जस्ता स्टार खेलाडीहरू छन्। अनुभवी र युवा खेलाडीको सन्तुलित संयोजन रहेको अर्जेन्टिना इजिप्टविरुद्ध जित निकाल्दै अर्को चरणमा पुग्ने लक्ष्यमा हुनेछ।

विश्व वरीयताको २४औँ स्थानमा रहेको इजिप्ट भने अर्जेन्टिनालाई कडा चुनौती दिँदै सम्भावित उलटफेरको खोजीमा रहनेछ। मेसी र सलाहबीचको प्रत्यक्ष प्रतिस्पर्धाले खेललाई अझ रोमाञ्चक बनाउने अपेक्षा गरिएको छ।