विदेशबाट फर्कने नेपालीलाई केही वस्तुमा पूर्ण महसुल छुट

काठमाडौं, २० जेठ।
सरकारले विदेशबाट नेपाल फर्कने नेपाली नागरिकहरूका लागि केही वस्तुमा पूर्ण महसुल छुट दिने व्यवस्था गरेको छ। बजेटमार्फत सार्वजनिक गरिएको व्यवस्था अनुसार वैदेशिक रोजगारीबाट फर्कने नेपालीहरूले निश्चित सर्तका आधारमा विभिन्न सामग्री महसुलबिनै ल्याउन पाउनेछन्।

सरकारका अनुसार, विदेशमा गएर कम्तीमा ६ महिना काम गरी फर्केका नेपाली नागरिकले आफूले प्रयोग गर्ने एक थान ट्याबलेट, ल्यापटप, डेस्कटप कम्प्युटर, घडी, क्यामेरा लगायतका सामग्रीबाहेक थप एक थान नयाँ मोबाइल फोन समेत महसुल छुटमा ल्याउन पाउनेछन्।

त्यस्तै, कम्तीमा १२ महिना वैदेशिक रोजगारीमा काम गरेर फर्कने नेपाली नागरिकले एक पटकका लागि मात्र ६५ इन्चसम्मको एक थान टेलिभिजन महसुल छुटमा ल्याउन सक्ने व्यवस्था गरिएको छ।

यसबाहेक, औषधि उपचार गरेर फर्कने बिरामीले साथमा ल्याएका औषधि, शारीरिक रूपमा अशक्त व्यक्तिले सहाराका रूपमा प्रयोग गरेका सामग्री, तथा सात किलोग्रामसम्म खाद्य परिकार पनि महसुल छुटको दायरामा पर्ने जनाइएको छ।

सरकारले तोकिएको परिमाणभन्दा बढी केही वस्तु ल्याएको अवस्थामा भने यात्रुको अवस्था, परिवार संख्या, बसेको मुलुक र विदेशमा बसेको समयावधिका आधारमा सम्बन्धित भन्सार कार्यालय प्रमुखले आवश्यकतानुसार छुट दिन सक्ने व्यवस्था पनि राखेको छ।

यो व्यवस्थाले वैदेशिक रोजगारीबाट फर्कने नेपालीहरूलाई केही राहत पुग्ने अपेक्षा गरिएको छ। विशेषगरी विदेशमा काम गरेर फर्कने श्रमिकलाई लक्षित गर्दै ल्याइएको यो प्रावधानले उनीहरूले आफ्ना लागि वा परिवारका लागि ल्याउने आवश्यक सामग्रीमा सहजता हुने विश्वास गरिएको छ।