उपत्यकाका सुनचाँदी व्यवसायी संघ/संस्थाको बैठक सम्पन्न, बजार एकरूपताका लागि महत्वपूर्ण निर्णय

काठमाडौं, २० जेठ।
काठमाडौं उपत्यकामा रहेका सुनचाँदी व्यवसायी संघ/संस्थाहरूको संयुक्त बैठक राजधानीको शंखमूलस्थित ए वन क्याफेमा सम्पन्न भएको छ। बैठकमा उपत्यकाभित्र रहेका तीनवटै जिल्लाका अधिकांश अध्यक्ष तथा महासचिवहरूको उपस्थिति रहेको थियो।

बैठकले सुनचाँदी व्यवसायलाई थप व्यवस्थित, मर्यादित र एकरूप बनाउने उद्देश्यसहित केही महत्वपूर्ण निर्णयहरू गरेको छ। साथै व्यवसायीहरूले भोग्दै आएका विभिन्न समस्याको समाधान तथा आवश्यक पहलका लागि संस्थागत जिम्मेवारीसमेत बाँडफाँट गरिएको छ।

बैठकको निर्णयअनुसार ग्राहकबाट सुनका गरगहना खरिद गर्दा बजार मूल्यको ५ प्रतिशत कम मूल्यमा खरिद गर्ने गरी एकरूपता कायम गर्ने निर्णय गरिएको छ। यसले बजारमा देखिने मूल्य असमानता कम गर्न सहयोग गर्ने अपेक्षा गरिएको छ।

त्यस्तै, उपत्यकाभित्र रहेका सुनचाँदी पसलहरू प्रत्येक शनिबार बन्द गर्ने निर्णयसमेत गरिएको छ। व्यवसाय सञ्चालनमा एकरूपता ल्याउन तथा व्यवसायीहरूबीच समन्वय कायम गर्न यो निर्णय गरिएको बताइएको छ।

बैठकले कुनै पनि संघ/संस्थामा अवाञ्छित गतिविधि गरी निष्कासन भएका सदस्यहरूलाई अर्को संस्थामा सदस्यता नदिने निर्णय पनि गरेको छ। यस निर्णयले संस्थागत अनुशासन, पारदर्शिता र व्यवसायिक मर्यादा कायम गर्न सहयोग पुग्ने सहभागीहरूको भनाइ छ।

सुनचाँदी व्यवसायीहरूलाई आइपर्ने विभिन्न समस्या समाधान, प्रहरी प्रशासनसँग समन्वय तथा आवश्यक पहलका लागि बैठकले विभिन्न व्यक्तिहरूलाई जिम्मेवारी तोकेको छ। निर्णयअनुसार जिल्ला प्रहरी कार्यालय काठमाडौंअन्तर्गत सुमन लामिछाने, जिल्ला प्रहरी कार्यालय ललितपुरअन्तर्गत सुबिन बज्राचार्य, जिल्ला प्रहरी कार्यालय भक्तपुरअन्तर्गत बिजेन रत्न शाक्य र जिल्ला प्रहरी कार्यालय काभ्रेअन्तर्गत उमेश शाक्यलाई समन्वयको जिम्मेवारी दिइएको छ।

त्यसैगरी, प्रहरी वृत्त गौशाला र बौद्धमा सुमन लामिछाने, प्रहरी वृत्त महाराजगञ्जमा श्यामकुमार विश्वकर्मा, अपराध अनुसन्धान महाशाखामा खेम तिरुवा, प्रहरी वृत्त सातदोबाटोमा सुबिन बज्राचार्य, प्रहरी वृत्त चापागाउँमा खेम तिरुवा र प्रहरी वृत्त ठिमीमा बिजेन रत्न शाक्यलाई जिम्मेवारी तोकिएको जनाइएको छ।

अन्य स्थानहरूमा पनि आगामी बैठकबाट क्रमशः इन्चार्ज तोक्दै जाने निर्णय भएको छ। व्यवसायीहरूका अनुसार यस किसिमको जिम्मेवारी बाँडफाँटले समस्या पर्दा तत्काल समन्वय गर्न सहज हुने र व्यवसायीहरूलाई संस्थागत रूपमा संरक्षणको अनुभूति हुने विश्वास गरिएको छ।

केही समयअघि भएको सामूहिक भेलामार्फत गठन गरिएको  अध्यक्ष फोरममार्फत उपत्यकाका सुनचाँदी व्यवसायीहरूबीच कार्यगत एकता अघि बढाउने निर्णय भएको छ। फोरममार्फत साझा समस्या, व्यवसायिक चुनौती, प्रशासनिक समन्वय र बजार व्यवस्थापनका विषयमा संयुक्त रूपमा पहल गरिने बताइएको छ।

बैठकले आगामी बैठक ललितपुर सुनचाँदी व्यवसायी संघको नेतृत्वमा बस्ने निर्णयसमेत गरेको छ। सहभागी व्यवसायीहरूले उपत्यकाभित्रका सुनचाँदी व्यवसायीहरूबीच एकता, अनुशासन र साझा नीति आवश्यक रहेको भन्दै यस्ता बैठकलाई निरन्तरता दिनुपर्नेमा जोड दिएका छन्।

बैठकले गरेका निर्णयहरू कार्यान्वयनमा आए सुनचाँदी व्यवसायमा देखिएका मूल्य असमानता, संस्थागत असमझदारी, प्रशासनिक समस्या र व्यवसायिक अनुशासनसम्बन्धी चुनौतीहरू समाधान गर्न सहयोग पुग्ने अपेक्षा गरिएको छ।