भारतीय सञ्चारमाध्यमको दाबी: ‘नेपाल झुक्यो’, नयाँ १ रुपैयाँको सिक्काबाट विवादित नक्सा हटाइने

०५ श्रावण, भारत । नेपाल सरकारले नयाँ १ रुपैयाँको सिक्काको डिजाइन परिवर्तन गर्ने निर्णय गरेपछि भारतीय सञ्चारमाध्यमहरूले त्यसलाई विभिन्न कोणबाट व्याख्या गरेका छन्। अधिकांश भारतीय मिडियाले यो निर्णयलाई नेपालले आफ्नो अघिल्लो अडानबाट पछि हटेको वा भारतप्रति नरम भएको संकेतका रूपमा प्रस्तुत गरेका छन्।

आजतक (Aaj Tak) ले “नेपाल झुक्यो” र “भारतलाई ठूलो कूटनीतिक सफलता” जस्ता शीर्षक प्रयोग गर्दै नयाँ १ रुपैयाँको सिक्काबाट लिम्पियाधुरा, लिपुलेक र कालापानी समेटिएको नक्सा हटाउने निर्णयलाई भारतको कूटनीतिक जितका रूपमा चित्रण गरेको छ।

त्यसैगरी, द टाइम्स अफ इन्डिया (The Times of India) ले “विवादित नक्सा हटाइयो” भन्ने शीर्षकमा समाचार प्रकाशित गर्दै यसलाई सन् २०२० को नक्सा विवादपछि आएको ‘प्रतीकात्मक परिवर्तन (Symbolic Shift)’ को रूपमा व्याख्या गरेको छ। समाचारमा यस कदमले नेपाल–भारत सम्बन्धमा सकारात्मक प्रभाव पार्न सक्ने उल्लेख गरिएको छ।

लाइभ हिन्दुस्तान (Live Hindustan) ले भने अझ कडा शैली अपनाउँदै “६ वर्षपछि नेपालको बुद्धि आयो! भारतसँगको विवादमा यू-टर्न” भन्ने शीर्षक प्रकाशित गरेको छ। उक्त समाचारमा नेपाल आफ्नो अघिल्लो निर्णयबाट पछि हटेको दाबी गरिएको छ।

यस्तै, हिन्दुस्तान (Hindustan) ले “नेपालले नयाँ १ रुपैयाँको सिक्काबाट विवादित नक्सा हटायो” शीर्षकमा समाचार प्रकाशित गर्दै नयाँ सिक्कामा नक्साको सट्टा लो ग्याकर गुम्बाको चित्र राखिएको उल्लेख गरेको छ। साथै, नेपालले लिपुलेक, लिम्पियाधुरा र कालापानीमाथिको आफ्नो दाबी कायम राखेको तथा भारतले पनि ती क्षेत्र आफ्नो भएको दाबी गरिरहेको तथ्यलाई समेत समाचारमा समावेश गरेको छ।