जेन–जी आन्दोलनमा १८ किलो सुन चोरी : बैंकले राहत नदिएको भन्दै राष्ट्रिय वाणिज्य बैंकको केन्द्रीय कार्यालय घेराउ
काठमाडौं, असार ८ – जेन–जी आन्दोलनका क्रममा १८ किलो सुन चोरी भएको घटनाबाट प्रभावित व्यवसायीहरूले राहतको माग गर्दै सिंहदरबार प्लाजास्थित राष्ट्रिय वाणिज्य बैंकको केन्द्रीय कार्यालय घेराउ गरेका छन्।
पीडित व्यवसायीहरूका अनुसार चोरी भएको सुन धितो राखेर बैंकबाट कर्जा लिइएको भए पनि घटनापछि बैंकले कुनै राहत वा सहुलियत नदिएको गुनासो गरेका छन्। उनीहरूले कर्जा तिर्ने समयावधि थप, ब्याजमा सहुलियत तथा विशेष राहत प्याकेजको व्यवस्था गर्न माग गरेका छन्।
बैंकको केन्द्रीय कार्यालय अगाडि भेला भएका व्यवसायीहरूले आफूहरू दोहोरो मारमा परेको बताएका छन्। एकातर्फ करोडौं रुपैयाँ बराबरको सुन चोरी भएको र अर्कोतर्फ बैंकले नियमित किस्ता तथा ब्याज तिर्न दबाब दिएको उनीहरूको आरोप छ।
प्रदर्शनकारीहरूले सरकारले घटनाको निष्पक्ष छानबिन गरी पीडित व्यवसायीहरूलाई न्याय दिलाउनुपर्ने मागसमेत गरेका छन्। उनीहरूले चोरी भएको सुनको खोजी तथा क्षतिपूर्तिका लागि सम्बन्धित निकायले प्रभावकारी कदम चाल्नुपर्ने बताएका छन्।
यता राष्ट्रिय वाणिज्य बैंकले भने यस विषयमा औपचारिक धारणा सार्वजनिक गरिसकेको छैन। व्यवसायीहरूले आफ्ना मागहरू सम्बोधन नभए थप आन्दोलनका कार्यक्रम घोषणा गर्ने चेतावनी दिएका छन्।
What's Your Reaction?
